OOS-KAAP. – ’n Verdagte (30) wat van afpersing beskuldig is, is Saterdag omstreeks 14:00 in Canzibe, Ngqeleni, tydens ‘n skietery met die polisie noodlottig gewond.
Luidens ‘n verklaring van brig. Nobuntu Gantana, polisiewoordvoerder, het lede van die taktiese reaksiespan (TRT) inligting ontvang oor ’n verdagte wat met ’n plaaslike afpersingsindikaat verbind word. Beamptes het probeer om ‘n voertuig waarin die verdagte en ‘n manlike passasier was, tot stilstand te bring, waarop die verdagte gestop het en op die polisiebeamptes begin skiet het. Die polisie het uit selfverdediging teruggeskiet en die verdagte noodlottig gewond. Die passasier is vir ondervraging geneem. ’n 9 mm-pistool en ammunisie is op die toneel gevind.
Alle nodige rolspelers was op die toneel teenwoordig. Die onafhanklike polisie-ondersoekdirektoraat (Opod) sal die skietvoorval ondersoek soos deur standaardprosedure vereis word.
