GAUTENG. – ‘n Verdagte (38) het Sondagoggend omstreeks 07:00 tydens ‘n gyselaarsdrama in Bedfordview glo verskeie persone geskiet en gewond terwyl hy sy vrou en kinders na bewering gevange gehou het.
Volgens lt.kol. Mavela Masondo het drie polisielede op die klagte van ‘n gyselaarsdrama in Klopperpark gereageer. Met aankoms op die toneel het die verdagte nie net ‘n familievriend binne die huis gewond nie, maar ook drie polisielede.
‘n Gyselaaronderhandelaar van die polisie, sowel as ‘n taakspan, is na die toneel ontbied, waarna die verdagte al die slagoffers vrygelaat en homself aan die polisie oorgegee het.
Die verdagte is op vier aanklagte van poging tot moord, ontvoering en aanranding met die doel om ernstig te beseer in hegtenis geneem.
Die familievriend en drie polisielede is in ‘n ernstige, maar stabiele toestand na die naaste mediese hulpsentrum geneem.
