OOS-KAAP. – ‘n Man (37) is in hegtenis geneem, nadat ‘n bejaarde egpaar vanoggend (Vrydag) omstreeks 03:00 tydens ‘n gewelddadige huisroof op die Wildlife Estate, in Sardiniabaai, ernstig beseer is. Die man (73) en vrou (68) is met ‘n panga en ‘n houtplank aangerand.
Kapt. André Beetge, polisiewoordvoerder, sê in ‘n verklaring twee verdagtes het die huis deur ‘n skuifdeur betree. Waardevolle items is van die egpaar geëis. Die verdagtes het met ’n selfoon gevlug nadat die alarm afgegaan het. Die slagoffers het ernstige kopbeserings opgedoen en is vir noodbehandeling na ’n hospitaal geneem.
Beetge bevestig Walmer-speurders het die verdagte in Bethlehemstraat, Walmer, opgespoor en in hegtenis geneem. Die gesteelde selfoon is by hom teruggevind. Hy word van inbraak en aanranding met die opset om ernstige liggaamlike skade te veroorsaak, aangekla. Die polisie soek steeds die tweede verdagte.
