GAUTENG. – ’n Vermeende voertuigdief is vroeg Donderdagoggend in die noorde van Pretoria in hegtenis geneem nadat ’n intelligensiegedrewe operasie ’n sindikaat wat na bewering in voertuigdiefstal betrokke is, ontwrig het. Twee gesteelde voertuie, ’n ongelisensieerde vuurwapen en ammunisie is tydens die operasie teruggevind.
Volgens Proshield Security Services is die operasie omstreeks 03:00 die oggend uitgevoer en was Tshwane-metropolisie se honde-eenheid, Tshwane-polisie se honde-eenheid, Tracker Connect, Wezindlela Group, GAC Risk Solutions, Proshield Security en Maximum Security betrokke.
Inligting is ontvang dat verdagtes ’n silwer Honda Amaze gebruik. Die voertuig is omstreeks 02:20 tot 02:30 saam met ’n rooi Volkswagen Polo op Soutpanpad (M35) in die rigting van Soshanguve gewaar. Toe die metropolisie die Honda probeer voorkeer, het die voertuig glo teen ‘n hoë snelheid weggejaag. Die agtervolging het tot in Soshanguve Blok A voortgeduur, waar dit in ’n doodloopstraat beland het.
Een vermeende verdagte is gewond nadat ’n vuurwapen glo tydens ’n poging om te vlug opgemerk is, waarna hy in hegtenis geneem is. Die Polo het intussen op die M35 weggejaag, waarna die bestuurder beheer verloor het nadat die voertuig ’n spoedhobbel getref en teen rotse langs die pad gebots het. Twee verdagtes het te voet gevlug.
Beamptes het tydens die soektog ook op ’n Nissan NP200 met ’n gebreekte aansitter en gestroopte binnekant afgekom. Volgens die ondersoek is die Polo en NP200 vroeër dieselfde oggend as gesteel aangemeld. Die Honda Amaze, wat glo in die misdrywe gebruik is, is ook in beslag geneem. ’n Selfoon en verskeie voorwerpe wat vermoedelik as gereedskap gebruik is om by voertuie in te breek, is gevind.
Sake wat met die ondersoek verbind word, sluit drie voertuigdiefstalsake by die Villieria-polisie, ’n saak van poging tot diefstal en ’n voertuigdiefstalsaak by Pretoria-Noord-polisie, asook ’n voertuigdiefstalsaak by die Wonderboompoort-polisie in. Die ondersoek duur voort.
Die Tshwane-metropolisie (TMPD) het die sukses afsonderlik bevestig.
