KWAZULU-NATAL. – ‘n Man (29) is gearresteer terwyl hy glo Woensdag dagga buite ‘n hoërskool in Lamontville aan leerlinge verkoop het.
Kol. Robert Netshiunda sê lede van die maatskaplike misdaadvoorkomingseenheid het ‘n wenk ontvang en ‘n operasie geloods.
“Tydens die uitvoering van die operasie is die verdagte saam met tien leerlinge, van wie agt meisies, in ‘n kamer langs die hoërskool gekry. Die verdagte is ook in besit gevind van dagga wat hy aan die jong skoolkinders verkoop het.”
Netshiunda sê met die oog op die eksamen is die leerlinge streng in die teenwoordigheid van hulle ouers gewaarsku en in die sorg van hul ouers vrygelaat.
Die verdagte verskyn vandag (Donderdag) op aanklag van handel in dagga in die Wentworth-landdroshof.
