GAUTENG. – Die polisie se taktiese reaksie-eenheid (TRT) van Ekurhuleni het Saterdag twee verdagtes in Ivory Park doodgeskiet en nog een gewond.
Kol. Dimakatso Nevhuhulwi sê TRT-lede was besig met patrollie in die gebied toe ‘n Ford Figo sonder ‘n registrasieplaat opgemerk is. Die polisielede het die verdagte voertuig tot stilstand probeer bring, maar die insittendes het weggejaag. In Dlaministraat is die voertuig geblokkeer, waarna ‘n insittende glo ‘n vuurwapen op die polisie gerig het.
Drie verdagtes is geskiet, van wie twee op die toneel dood verklaar is. Die beseerde verdagte is onder polisiebewaking in ‘n hospitaal. ‘n Vuurwapen, waarvan die reeksnommer afgevyl is, is in die voertuig gevind.
Nevhuhulwi bevestig die verdagte in die hospitaal sal vir die rig van vuurwapen en die besit van ‘n ongelisensieerde vuurwapen aangekla word.
