Lees ook: Michelle Botes oorlede
POTCHEFSTROOM. – Die publiek word gewaarsku om versigtig te wees wanneer hulle hulle bankkaarte hierdie feestyd gebruik.
Dit volg na twee onderskeie voorvalle waar verdagtes in hegtenis geneem is vir besit van verskeie bankkaarte.
In die eerste voorval op Woensdag het ‘n man probeer geld trek by ‘n inkopiesentrum in Potchefstroom. Na hy sy kaart en pin by die OTM ingetik het, het hy nie geld gekry nie. Toe hy die transaksie kanselleer, het hy opgemerk die kaart wat hy teruggekry het, is nie sy kaart nie. Hy het toe ‘n boodskap gekry dat geld by ‘n vulstasie uit sy rekening onttrek is. Die man het sy kaart geblok, na die vulstasie gegaan en op die CCTV-kameras gekyk wie die geld onttrek het. Hy is daarna polisie toe.
Die slagoffer het Vrydag weer geld probeer trek en ‘n man opgemerk wat lyk soos die man in die CCTV-beeldmateriaal en vir hulp geskree. Die verdagte het probeer vlug, maar is by die taxistaanplek aangekeer. Die polisie het hom in hegtenis geneem en verskeie bankkaarte in sy beursie gevind.
Nog ‘n verdagte met verskeie bankkaarte wat in sy onderklere weggesteek is, is Vrydag in Potchefstroom in hegtenis geneem na die polisie sy voertuig gesien het.
Die tweede verdagte is in Gauteng ook op verhoor vir dieselfde aanklagte.
Beide verdagtes sal Maandag in die Potchefstroom-landdroshof verskyn op aanklagtes van besit van moontlik gesteelde eiendom.
Bronne: SAPD
Lees ook: Michelle Botes oorlede
