KWAZULU-NATAL. – Tydens ‘n gesamentlike operasie van wetstoepassers is Vrydag in Ottawa ervaar hoe verdagtes hulleself van die lang arm van die gereg beskerm deur toegang te bemoeilik.
Reaction Unit South Africa sê tydens ‘n soektog na ‘n verdagte is gevind hy het toegang tot sy huis onder andere met pitbulls, lemmetjiesdraad, ‘n elektriese heining versper. Dit is waarskynlik ‘n poging om beamptes te keer en vir tyd te speel. Hierdie maatreëls bemoeilik wetstoepassingsagentskappe se werk.
Kieran Ramjogi van Rusa moes toegang deur die dak van ‘n perseel verkry, terwyl ‘n ander beampte ‘n hond gepaai het. Boutsnyers moes ook in die proses gebruik word.
Rusa sê die vertragingstegniek is om verdagtes tyd te gee om byvoorbeeld dwelms te vernietig, wapens te versteek en ‘n ontsnaproete te beplan.
