KWAZULU-NATAL. – Vier mans tussen 30 en 41 is Woensdag in Margate met vyf ongelisensieerde vuurwapens, ammunisie en ’n gesteelde voertuig in hegtenis geneem.
Lt.kol. Paul Magwaza, polisiewoordvoerder, sê in ‘n verklaring polisiebeamptes en ‘n voertuignasporingsmaatskappy het ‘n sein van ‘n gesteeld voertuig by ‘n adres in Uvongo gevolg. ‘n Ford Ranger met vals registrasiebesonderhede is in die motorhuis aangetref. Verdere ondersoek het bevestig dat die voertuig in Augustus in Phoenix gesteel is. Tydens die deursoeking het die polisie ‘n arsenaal wapens ontdek – ’n AK47-aanvalsgeweer met 106 rondtes, ’n R4-aanvalsgeweer met 70 rondtes, ’n .303-geweer met 12 patrone, asook twee pistole met 22 rondtes.
Die vier verdagtes is in hegtenis geneem en van die besit van ’n gesteelde voertuig en ongelisensieerde vuurwapens en ammunisie aangekla.
Hulle verskyn vandag op die aanklagte in die Hibberdene-landdroshof.
