LIMPOPO. – ’n Grootskaalse soektog is van stapel gestuur om twee gewapende verdagtes wat Vrydag en Saterdag vir sewe gewelddadige huisrowe en seksuele aanrandings in Hoveni-dorp in die Maake-polisiegebied verantwoordelik was, op te spoor.
Kol. Malesela Ledwaba sê die insidente het tussen Vrydag omstreeks 23:30 en Saterdag in die vroeë oggendure plaasgevind, toe sewe huishoudings in dieselfde gemeenskap geteiken is in wat voorkom as ’n gekoördineerde en beplande misdaadveldtog.
Die verdagtes het deure oopgebreek, met vuurwapens huise binnegegaan, geld en waardevolle items geëis en verskeie gewelddadige misdade gepleeg, insluitend drie afsonderlike voorvalle van verkragting en ook die seksuele aanranding van minderjariges van 14 en 15 jaar oud, sowel as aanranding met die opset om ernstig te beseer.
‘n Manlike slagoffer, tans in die hospitaal, is verskeie kere geskiet in ‘n poging tot moord. Kontant en selfone is in die huisrowe gesteel en verskeie skote afgevuur.
Forensiese spanne het reeds verskeie bewysstukke, soos leë patroondoppies, van die tonele versamel. ’n Gespesialiseerde taakspan bestaande uit speurders van die provinsiale eenheid vir ernstige en geweldsmisdade, misdaadintelligensie en die taktiese reaksie-eenheid is saamgestel om die sake te ondersoek.
Lt.genl. Thembi Hadebe, die provinsiale kommissaris van polisie in Limpopo, sê: “Wat ons in Hoveni-dorp gesien het, is ’n aanval nie net op individuele gesinne nie, maar op die veiligheid en waardigheid van ons hele gemeenskap. Ek het ons mees ervare speurders opdrag gegee om hierdie saak te prioritiseer en het bykomende gespesialiseerde eenhede na die gebied ontplooi. Hierdie gevaarlike misdadigers sal gevind word en deur die volle mag van die reg in die gesig gestaar word. Die vlak van geweld wat tydens hierdie misdaadveldtog geopenbaar is, is diep ontstellend. Hierdie misdadigers het geen respek vir menslike lewe en waardigheid getoon nie, veral nie teenoor weerlose vroue en kinders nie. Ons sal nie rus totdat hulle agter tralies is nie.”
Enigiemand met relevante inligting kan AO Phaladi Makola by 082 749 2233 of kol. Richard Boshomane by 079 894 5501 bel.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
