KWAZULU-NATAL. – Die saak teen 62 beweerde aanhitsers, wat aangekla is in verband met die onrus en openbare geweld wat in Julie 2021 in verskeie dele van KwaZulu-Natal plaasgevind het, het Maandag na die Durbanse hooggeregshof teruggekeer. Die verhoor sal eersdaags begin.
Natasha Ramkisson-Kara, NVG-woordvoerder, sê in ‘n verklaring die hof het die saak as gereed vir verhoor verklaar en dit op die rol geplaas. Die saak sal vir die tydperke van 20 Julie tot en met 21 Augustus, asook van 24 Augustus tot en met 18 September in die hof voorkom. Die beskuldigdes staan tereg op aanklagte van sameswering om openbare geweld te pleeg, aanhitsing tot openbare geweld, terrorisme, hoogverraad en sameswering om moord te pleeg.
Onrus het in Julie 2021 uitgebreek ná die inhegtenisneming van oudpresident Jacob Zuma vir minagting van die hof. Wat aanvanklik as protesaksies begin het, het vinnig ontaard in wydverspreide plundering, brandstigting en openbare geweld, veral in KwaZulu-Natal en Gauteng. Winkels, pakhuise, fabrieke en kritieke infrastruktuur is beskadig of vernietig. Meer as 350 mense het hul lewens verloor, en die ekonomiese skade is op miljarde rande geraam. Die weermag is later ontplooi om stabiliteit te herstel.
