WES-KAAP. – Die liggaam van ‘n man (67) is Woensdag omstreeks 15:45 op ‘n plaas naby die N2 by Harkerville, tussen Knysna en Plettenbergbaai, gevind. Sy liggaam is op die plaas gevind nadat sy voertuig verlate aangetref is.
Sers. Christopher Spies, Tuinroete-polisiewoordvoerder, sê aan Nuusflits die oorledene is met vasgebinde hande en veelvuldige beserings aan sy liggaam en kop deur veiligheidsbeamptes ontdek. Hy is op die toneel dood verklaar. ’n Mercedes-Benz, wat aan die oorledene behoort het, is vroeër verlate in Sedgefield, Knysna, aangetref. Die soektog na die eienaar het veiligheidsbeamptes na die plaas gelei waar die liggaam gevind is. Die saak word deur Plettenbergbaai-speurders ondersoek.
Twee verdagtes, ’n vrou (28) en ‘n man (34), is in hegtenis geneem en verskyn vandag op aanklagte van moord en voertuigdiefstal in die Plettenbergbaai-landdroshof.
