LIMPOPO. – ‘n Groep verdagtes wat glo Dinsdag vier persone op ‘n plaas langs die N1 in die Musina-polisiëringsarea oorval, aangehou en beroof het, word deur die polisie gesoek.
Brig. Hlulani Mashaba sê die vier slagoffers het geslaap toe hulle geluide van buite hoor. Na bewering het ‘n groep verdagtes, waarvan sommige gewapen was, toegang na die kamers forseer. Die slagoffers is met ‘n wielsleutel aangerand.
Geld en selfone is glo van die inwoners geeïs en die verdagtes het met selfone, ‘n televisie, geld en ander besittings ter waarde van meer as R29 000 van die toneel gevlug.
Mashaba sê die polisie ondersoek ‘n saak van huisroof en poging tot moord.
Enigiemand met inligting word versoek om sers. Rudzani Rambuwani by 076 476 7520 te bel.
