MPUMALANGA. – Die liggaam van Khayone Xavier Pakeni (2), wat op Woensdag 9 Oktober omstreeks 10:00 in Embalenhle in Secunda vermis geraak het, is in ‘n veld ontdek.
Kol. Donald Mdhluli sê die gemeenskap het lede van GKS van die kinderliggaam, wat in ‘n kombers toegedraai was, verwittig. Nooddienste het die seun op die toneel dood verklaar.
Nuusflits het voorheen berig die seun en sy ma het water by ‘n skool gaan haal. Hy het daarna buite die huis gespeel en weggeraak. ‘n Soektog na die kleuter het niks opgelewer nie. Hy is daarna as vermis aangemeld en weer was daar sonder sukses na hom gesoek.
“Verdere forensiese ondersoek sal deel wees van die voortgesette ondersoek. Tot dusver is geen arrestasies gemaak nie, maar die SAPD bly daartoe verbind om hierdie saak op te los en die oortreders aanspreeklik te hou.”
Die polisie versoek enigiemand met inligting om na vore te kom.
