LIMPOPO. – Mashawana Madega (51) het Vrydag in die Thohoyandou-landdroshof verskyn op twee aanklagte van ontvoering, twee van moord, besit van ’n ongelisensieerde vuurwapen en regsverydeling.
Volgens Mashudu Malabi-Dzhangi, woordvoerder van die NVG, het Madega borgtog laat vaar. Sy arrestasie hou verband met twee insidente waarin die liggaam van ’n vermiste tienermeisie met steekwonde en die onherkenbaar verbrande liggaam van ’n vrou onderweg na haar werk ontdek is.
Die 15-jarige meisie het op 10 November vermis geraak nadat sy kerk toe vertrek het. Toe sy nie terugkeer nie, is sy as vermis aangemeld. Ooggetuies beweer sy was laas saam met Madega gesien. Haar liggaam is die volgende dag in bosse gevind.
In ’n ander voorval het Madega glo vir ’n vrou onderweg werk toe ’n saamrygeleentheid aangebied. Sy is egter na bosse geneem waar haar verbrande liggaam later deur ’n verbyganger ontdek is.
Madega is op 11 November gearresteer. Die saak is tot 13 Januarie 2025 vir verdere ondersoek uitgestel. Die verdagte bly in aanhouding.
