WES-KAAP. – Die liggaam van Joan Singrew (54) van Rosemoor, in Conville, George, is Maandag 25 November 2024, op haar verjaardag, buite Groot-Brakrivier gekry nadat sy die vorige Donderdag as vermis aangemeld is. Twee verdagtes is vanoggend (Vrydag) vir haar moord gearresteer.
Sers. Christopher Spies sê Singrew was nie tuis toe haar dogter daar kom nie en is as vermis aangemeld. ‘n Soektog het na haar liggaam in bosse gelei. ‘n Moorddosier is geopen en die toneel vir leidrade gefynkam. Woensdag is ‘n nadoodse ondersoek gedoen om die oorsaak van Singrew se dood vas te stel. Die verslag is deel van die ondersoek.
Spies sê Conville-polisie het vanoggend twee verdagtes gearresteer. Hule sal na verwagting Maandag op aanklag van moord in die George-landdroshof verskyn.
Die ondersoek duur voort.
