VRYSTAAT. – Die liggaam van ‘n meisie (11) is by ‘n treinspoor op Bohlokong gelos nadat sy glo op 29 Desember vermoor is.
Adj.off. Mmako Mophiring sê die meisie is na bewering omstreeks 10:20 deur die verdagte ontbied om vir hom sigarette te gaan koop. Met haar terugkeer is sy verwurg en brutaal vermoor. Haar liggaam is met ‘n oop wond aan die nek langs ‘n treinspoor gevind.
Mophiring sê die moontlikheid van verkragting is nie uitgeskakel nie en ‘n nadoodse ondersoek sal gedoen word om die oorsaak van die meisie se dood vas te stel.
Die verdagte sal op 2 Januarie op ‘n aanklag van moord in die Bethlehem-landdroshof verskyn.
