LIMPOPO. – Morudi Frank Phetla, ‘n manlike verpleër (64), is glo Sondagaand omstreeks 19:00 ontvoer toe hy by sy erf in Jane Furse wou ingaan. Die polisie is na verdagtes op soek nadat hy vermoor aangetref is.
Lt.kol. Stephen Thakeng sê die verpleër se voertuig is met die hoofligte steeds aan gevind waar dit staan en luier het, maar hy was egter nêrens te vinde nie. ‘n Saak van ontvoering is vir verdere ondersoek geopen.
Op 17 Maart, omstreeks 06:30 is ‘n liggaam met kopbeserings deur ‘n veewagter onder die Mabintanabrug aangetref. Die liggaam is deur naasbestaandes as dié van die vermiste verpleër geïdentifiseer. Die motief vir die moord is onbekend en die ondersoek duur voort.
Enigiemand met relevante inligting kan speur.sers. Vusimuzi Mohlala by 082 479 2828 bel.
