KWAZULU-NATAL. – ’n Man wat verstandelik gestrem is, is Donderdag kritiek beseer tydens ‘n huisroof in die Grove End-gebied van Phoenix. Die verdagte, glo bekend in die gebied vir roof, het met ‘n onbekende aantal gesteelde items van die toneel gevlug.
KZN VIP Protection Services sê in ‘n sosialemediaplasing lede van dié diens se noodreaksie-eenheid is dadelik na aanmelding van die voorval na die toneel. Met aankoms is die slagoffer in ’n kritieke toestand aangetref en dringende mediese hulp is versoek. KZN VIP-ambulansdiens het die ernstig beseerde man na ’n nabygeleë mediese fasiliteit vervoer.
Die Suid-Afrikaanse Polisiediens (SAPD) is in kennis gestel en ’n ondersoek is van stapel gestuur. Geen inhegtenisnemings is tot dusver gemaak nie. Owerhede doen ’n beroep op enigiemand met inligting om na vore te kom.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
