KWAZULU-NATAL. – Vier gesoekte verdagtes is Donderdag tydens ‘n oor-en-weer-skietery met die polisie in Cato Manor doodgeskiet.
Kol. Robert Netshiunda sê die provinsiale stabiliseringspan het inligting oor die gesoekte verdagtes van Inanda, wat vir onder meer moord gesoek word, opgevolg. Die verdagtes is in ‘n gehuurde kamer gekry. Toe die polisie hulle teenwoordigheid aankondig, het die verdagtes op hulle geskiet. Die polisie het teruggeskiet en al vier die verdagtes in die kamer is doodgeskiet.
Twee vuurwapens is in die besit van die verdagtes gevind. Die verdagtes het glo ‘n man (27) op 23 Maart in Moverstraat in Cato Crest doodgeskiet. Daar word vermoed hulle het die betrokke area verlaat omdat hulle glo bewus was die polisie is op hulle hakke.
‘n Polisiebeampte, wat raakgeskiet is, is deur sy koeëlvaste baadjie gered en sal sielkundige ondersteuning ontvang.
