MPUMALANGA. – Vier mense, drie vroue en ’n seun, is Saterdagmiddag dood toe die Toyota Avanza waarin hulle gereis het, beheer verloor en op die N11 tussen Middelburg en die Loskopdam omgeslaan het.
Luidens ‘n verklaring deur Moeti Mmusi, woordvoerder vir die provinsiale departement van gemeenskapsveiligheid, sekuriteit en skakeling, is die oorledenes op die toneel dood verklaar. Nog ‘n insittende is ernstig beseer, terwyl die bestuurder en nog een persoon net ligte beserings opgedoen het. Die beseerdes is vir verdere mediese behandeling na nabygeleë fasiliteite geneem.
Die oorsaak van die ongeluk word nog ondersoek, maar roekelose of nalatige bestuur word nie uitgesluit nie.
