GAUTENG. – Vier leerlinge van Laerskool Tom Nesby, Laerskool Ryfield en ‘n vroeëkinderontwikkeling-sentrum (ECD) het vanoggend (Maandag) op die N12 in Daveyton, Ekurhuleni in ‘n ongeluk gesterf.
Steve Mabona, woordvoerder vir die Gautengse onderwysdepartement, sê verskeie voertuie was in die ongeluk naby die afrit op die Putfontein-pad betrokke. Die voertuig waarin die kinders was, is ‘n privaat skoliervervoer-voertuig. Die oorledenes is broers, in gr. 1 en gr. 3 by Laerskool Tom Newby in Benoni, ‘n seun in gr. 1 van Laerskool Ryfield, ook in Benoni, en ‘n seun in gr. R van ‘n vroeëkinderontwikkeling-sentrum wat nog nie geïdentifiseer is nie.
Mabona sê voorts ‘n meisie in gr. 3 van Laerskool Ryfield kritiek is beseer en ontvang dringende mediese hospitaalbehandeling.
‘n Psigososiale-ondersteuningseenheid is na beide van die skole ontplooi, sodat leerlinge en personeel ondersteun kan word.
Mabona sê wetstoepassingsowerhede ondersoek die oorsaak van die ongeluk.
Foto’s: Vision Tactical
