Waarskuwing! Die video-opname aan die einde van die berig kan sensitiewe lesers ontstel.
WES-KAAP. – Vier insittendes het gesterf en twee is kritiek beseer nadat hulle voertuig Saterdagaand omstreeks 18:00 in Cecil Morganrylaan, Brackenfell, in ‘n boom vasgery en aan die brand geslaan het. ‘n Saak van strafbare manslag word deur die Brackenfell-polisie ondersoek.
Kapt. Frederick van Wyk, polisiewoordvoerder, sê aan Nuusflits die oorledenes is op die toneel dood verklaar. Die omstandighede van die ongeluk word ondersoek. Enigiemand met relevante inligting word gevra om na vore te kom.
Titanium Securitas het Saterdagaand gesê die pad is in beide rigtings vir verkeer gesluit. Die voertuig het in vlamme uitgebars nadat dit die boom getref het. Die twee beseerde insittendes is op die toneel gestabiliseer en daarna na nabygeleë hospitale geneem.
Hoërskool Fairmont sê in ‘n Facebook-plasing: “Dit is met diep gebroke harte dat ons die afsterwe van twee jong lede van ons Fairmont-familie erken.
Ons is uiters hartseer oor die verlies van Perth Eksteen, ’n lewendige en onvergeetlike graad 12-leerder. Perth was vol energie, selfvertroue en lewenslus. Hy was nooit iemand wat ongemerk verbygegaan het nie. Sy sterk teenwoordigheid, sin vir humor en skerp humorsin het ’n blywende indruk op beide sy maats en onderwysers gemaak. Hy het lewe gebring in elke ruimte wat hy betree het en sal baie gemis word.
Ons eer ook die nagedagtenis van Daniel Jansen van Rensburg, ’n oud-leerder wat Fairmont steeds trots op die rugbyveld verteenwoordig het nadat hy na tuisonderrig oorgeskakel het. Daniel se passie vir die sport en sy stille vasberadenheid het hom ’n gewaardeerde spanmaat en vriend gemaak.
Ons dink in hierdie ongelooflik moeilike tyd aan die Eksteen- en Van Rensburg-gesinne en dra hulle op in ons gebede en innige meegevoel. Ons staan saam met almal in ons skoolgemeenskap wat rou oor die verlies van hierdie twee jong mans.”
Sian Eksteen, Perth se ma, het Hoërskool Fairmont se plasing oor die afsterwe van Perth en Daniel Jansen van Rensburg, ‘n oud-leerling, op haar Facebook-blad gedeel en gesê haar seun moet in vrede rus. Sy het ook meer foto’s van hom in ‘n aparte plasing gedeel.
