OOS-KAAP. – Vier verdagtes is in die vroeë oggendure in ’n skietery met die polisie in Keiskammahoek noodlottig gewond, en nog een is beseer.
Lt.kol. Siphokazi Mawisa het bevestig dat die voorval in die Marikana-woonbuurt, in die Shoxa- administratiewe area van Qoboqobo (Keiskammahoek), plaasgevind het. Lede van die taktiese reaksie-eenheid (TRT) in Mdantsane en Oos-Londen het inligting van verdagtes wat glo in besit van ongelisensieerde vuurwapens was, opgevolg.
Toe die polisie die perseel betree, het die verdagtes probeer vlug en het na bewering op die polisie geskiet. In die daaropvolgende skietery is vier verdagtes, tussen die ouderdomme van 29 en 40 jaar, doodgeskiet. ’n Vyfde verdagte (38) is gewond en word onder polisiebewaking in ’n hospitaal aangehou.
Drie ongelisensieerde vuurwapens met ammunisie, asook twee voertuie, ’n Toyota Hilux en ’n Corsa-bakkie, is deur die polisie gekonfiskeer. Die voertuie word vermoedelik as gesteel gesoek.
Die saak is na die Onafhanklike Polisie-ondersoekdirektoraat (Opod) verwys vir verdere ondersoek.
