JOHANNESBURG. – ’n Nuwe verslag van die Verenigde Nasies waarsku dat die wêreld nie meer net in ’n waterkrisis is nie, maar nou in wat hulle “globale waterbankrotskap” noem.
Volgens eNCA lui die verslag dat varswaterstelsels wat miljarde mense ondersteun, reeds onomkeerbare skade ly. Stede soos Kaapstad, São Paulo en Tehran het al ernstige watertekorte beleef en was naby aan sogenaamde “Dag Nul”-situasies, waar water byna geheel en al opraak.
Die verslag toon dat landbou sowat 70% van die wêreld se varswater gebruik. Intussen word ’n derde van die wêreld se belangrikste voedselgewasse in gebiede verbou waar water reeds skaars is.
Kaveh Madani, direkteur van die VN se Universiteitinstituut vir Water, Omgewing en Gesondheid, sê wêreldwye waterstelsels bereik breekpunt. Volgens hom is watertekorte en droogtes besig om ’n chroniese probleem te word.
Meer as die helfte van die wêreld se groot mere het sedert die vroeë 1990’s gekrimp, en ongeveer 35% van natuurlike vleilande het sedert 1970 verdwyn.
“Wat ons nou sien, is nie meer herstel nie. Die krisisfase is verby. Ons sien nou mislukking en waterbankrotskap,” het hy gesê.
Die verslag waarsku dat ontwikkelingsbeplanning hersien moet word, ekonomieë gediversifiseer moet word en kwesbare gemeenskappe beter beskerm moet word teen die gevolge van waterskaarste.
Bronne: eNCA, Engineering News
