GAUTENG. – Siphokazi Magangana, ’n voormalige distriksaanklaer by die Johannesburg-landdroshof, en Yandisa Yolanda Jam Jam, haar beweerde medepligtige, het op aanklagte van korrupsie en geldwassery in die Roodepoort-landdroshof verskyn.
Phindi Mjonondwane, woordvoerder van die NVG, sê in ‘n verklaring aan Nuusflits die aanklagte spruit uit bewerings dat Magangana geld van kwesbare lede van die publiek wat desperaat was vir werk, gevra het. In Augustus 2022 het sy glo drie persone oorreed om elk R10 000 in Jam Jam se bankrekening te betaal. In ruil vir die geld sou die drie permanente aanstellings as aanklaers kry, sonder om enige onderhoude te doen. Toe hierdie belofte nie nagekom is nie, het die drie in Mei 2023 ‘n saak by die kantoor vir etiek en aanspreeklikheid van die Nasionale Vervolgingsgesag (NVG) aangemeld. In Desember 2023 het dié eenheid aanbeveel dat die saak na die NVG se eenheid vir arbeidsverhoudinge vir dissiplinêre optrede verwys moet word en dat Magangana van korrupsie en bedrog aangekla word.
Albei beskuldigdes bly in aanhouding en sal weer op 20 Junie vir ‘n moontlike borgtogaansoek in die hof verskyn.
Mjonondwane waarsku die publiek om nie slagoffers van vals beloftes te word nie. Die NVG volg ’n amptelike en deursigtige aanstellingsproses waarin geen betaling vereis word nie. Werksgeleenthede word op die amptelike webtuistes bekend gemaak.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
