LIMPOPO. – Olson Mnisi (64), ‘n voormalige adjudant-offisier van Namakgale, wat intussen afgetree het, is vir die moord op kol. Matsitele, ‘n kollega, op 9 September 2018, tot 20 jaar direkte gevangenisstraf gevonnis.
Lizzy Suping, Opod-woordvoerder, sê in ‘n verklaring Matsitele en konst. Mashego van Bosbokrand-polisiekantoor is op die betrokke datum na Namakgale om ’n verdagte in verband met ’n sakeroof en onwettige vuurwapenbesit in hegtenis te neem. Mnisi en twee ander polisiebeamptes het bystand verleen toe dit versoek is. Terwyl Matsitele en Mashego gesukkel het om die verdagte aan te keer, het Mnisi skote in hulle rigting geskiet. Konst. Hlungwane het ook ’n skoot geskiet. Matsitele is in die been en maag getref en is later in ‘n hospitaal oorlede.
Mnisi is aan moord en twee aanklagte van poging tot moord skuldig bevind. Hy is tot 20 jaar vir moord en agt jaar vir elke poging tot moord gevonnis. Die vonnisse sal gelyklopend uitgedien word.
Konst. Hlungwane is van alle aanklagte vrygespreek.
