MPUMALANGA. -Die voormalige konstabel, Thembi Aretha Mhlanga (47), en Sarel Sithole (37) het glo ‘n bejaarde uit pensioengeld bedrieg. Mhlanga is op borg van R1 000 vrygelaat, maar Sithole bly weens vorige uitstaande sake in aanhouding.
Lt.kol. Jabu Ndubane sê ‘n bejaarde vrou (71) van Masoyi is glo op 3 Januarie deur twee vroue genader en hulp aangebied toe sy haar pensioengeld by ‘n OTM wou onttrek. Daar is na bewering vir haar gesê daar is nie internetopvangs by die OTM nie en sy is aangeraai om geld by ‘n supermark te onttrek.
By die supermark het die slagoffer opgemerk haar bankkaart is omgeruil. Tydens aanmelding van die gebeure in Hazyview is opgemerk R1 700 is reeds uit die rekening onttrek. ‘n Saak is by die polisie geopen. Die verdagtes is Maandag in hegtenis geneem en van bedrog aangekla. Mhlanga was voorheen by Skukuza-polisiestasie gestasioneer. Beide het Woensdag in die Kabokweni-landdroshof voorgekom.
Die saak kom weer op 15 Januarie in die Masoyi- periodieke hof voor.
