LIMPOPO. – Sers. Pitsiyekgolo Jafta Rachoene (43) is vir die moord op Desmond Muhkuba deur die Polokwane-streekhof gevonnis. Rachoene het Mukhuba ná ‘n ongeluk geskiet
Phaladi Shuping, woordvoerder vir die onafhanklike polisie-ondersoekdirektoraat (Opod), sê in ‘n verklaring Rachoene was op 4 Junie 2022 van diens. Hy het in Landdros Mare-straat teen Mukhuba se minibus gebots. Hy het daarna sy dienspistool uitgehaal en Mukhuba in die bors geskiet. Mukhuba is op die toneel dood.
Rachoene is ná ‘n Opod-ondersoek aangekla en deur die hof skuldig bevind aan die moord. Hy is 20 jaar direkte gevangenisstraf opgelê. Benewens tronkstraf is hy ook onbevoeg verklaar om ’n vuurwapen te besit.
