NOORD-KAAP. – Dawn Celeste Pieterson (45) is Woensdag deur die Calvinia-landdroshof aan nege aanklagte van bedrog, sowel as twee oortredings van die wet op geboorte- en sterfteregistrasie, skuldig bevind. Die aanklagte val onder die strafproseswet.
Lt.kol. Tebogo Thebe, Valke-woordvoerder, sê in ‘n verklaring die bedrog het tussen Februarie 2019 en September 2022 plaasgevind. Pieterson was ‘n werknemer by die departement van binnelandse sake op Calvinia. Sy het toegang tot die nasionale bevolkingsregister gehad en het begrafnisversekering by bekende maatskappye uitgeneem en haarself as begunstigde aangewys. Om voordeel te trek, het sy die register gemanipuleer deur vals vorms van kennisgewing van dood uit te reik. Dit het die slagoffers as oorlede laat registreer, wat groot probleme in hul daaglikse lewens veroorsaak het.
Die saak is vir vonnisoplegging tot 26 Januarie 2026 uitgestel.
