NOORD-KAAP. – ‘n Voormalige finansiële administrateur (43) van die Hoërskool Kathu is Donderdag deur die Valke by haar huis in Kathu in hegtenis geneem. Sy het na bewering sowat R4,6 miljoen uit die skool se geld verduister.
Lt.kol. Tebogo Thebe, Valke-woordvoerder, sê die vrou staan tereg op aanklagte van bedrog, vervalsing en die gebruik van vervalste dokumente. Volgens die ondersoek het sy glo skool- en skenkingsgeld, wat onder meer gebruik word om salarisse van onderwysers wat deur die skoolbeheerliggaam (SBL) aangestel is te betaal, na private bankrekeninge oorgeplaas wat sy na bewering self geopen het.
Die beweerde bedrog het in Oktober verlede jaar aan die lig gekom toe ‘n oudit onreëlmatighede in die skool se finansiële rekords blootgelê het. Die ondersoek het daarna aan die lig gebring dat die verdagte na bewering vals fakture opgestel het wat voorgegee het om van wettige diensverskaffers te wees. Betalings is vervolgens glo goedgekeur en na haar persoonlike rekening oorgeplaas. Daar word verder beweer dat sy haarself oortydbetaling toegestaan het, ondanks die feit dat die skool se beleid dit verbied.
Die vrou sal na verwagting vandag in die Kathu-landdroshof verskyn, waar sy om borgtog sal aansoek doen.
