LIMPOPO. – Nkhetheni Mudau (36) is Maandag in Vhembe dood in ‘n plas bloed gevind nadat sy na bewering met ‘n harde voorwerp aangerand is. Die polisie is op soek na haar man.
Brig. Hlulani Mashaba sê die polisie is na die toneel in Thivaloni-woonbuurt ontbied nadat die liggaam van die vrou ontdek is. Die oorledene het beserings aan haar bolyf opgedoen. Tydens die voorlopige ondersoek is bevind daar was dieselfde oggend ‘n argument tussen die vrou en haar man. Daar kon gehoor word hoe ‘n vrou huil en skree. Sy is later dood aangetref.
Die polisie ondersoek ‘n moord waarvan gesinsgeweld as motief nie uitgesluit kan word nie.
Enigiemand met inligting word gevra om sers. Makuya by 082 414 2481 te bel.
