KWAZULU-NATAL. – ’n Vrou en haar drie kinders is Vrydagaand buite ’n eiendom in Ivernham, Phoenix, met vuurwapens gekonfronteer en van hul voertuig beroof.
KZN VIP Protection Service sê volgens ‘n sosialemediaplasing het die voorval net ná 20:20 plaasgevind toe dié diens se reaksiebeamptes met ‘n paniekalarm na Ivernhamrylaan ontbied is. Met aankoms is bevestig dat ’n kaping buite die eiendom plaasgevind het. Die slagoffer het verduidelik sy het pas ’n leerling afgelaai toe ‘n VW Polo,waarvan die registrasienommer en kleur onbekend is, haar voertuig versper het. Vier gewapende verdagtes het glo uit die voertuig geklim, haar met ’n vuurwapen gedreig en haar en haar kinders beveel om uit te klim. Die verdagtes is toe met haar voertuig en ’n onbekende aantal waardevolle items weg.
Niemand is beseer nie. KZNVIP het onmiddellik ’n soektog in die omgewing geloods, maar die voertuig is nie opgespoor nie. Die polisie is ingelig en ondersoeke duur voort.
Die gekaapte voertuig is ’n grys Hyundai i20 met registrasienommer C3 OP FG ZN.
