LIMPOPO. – ‘n Vrou (20) is in hegtenis geneem nadat ‘n drie maande oue baba Vrydag omstreeks 18:00 in Mundzezi glo deur haar doodgewurg is.
Kol. Malesela Ledwaba, polisiewoordvoerder, sê in ‘n verklaring polisiebeamptes was op patrollie toe hulle omstreeks 18:30 na die Vleifontein-kliniek ontbied is. Daar is hulle ingelig dat twee individue ‘n kind wat oorlede is, na die kliniek gebring het. Die liggaam van die kind is op ‘n bed uitgewys.
Twee persone het aan die polisie gesê hulle het saam met die verdagte, wat die baba in haar arms vasgehou het, buite die huis gesit. Die verdagte het opgestaan en die baba die huis in geneem. Ná ’n paar minute het die twee persone in die huis gaan kyk wat aangaan. Daar het hulle glo die verdagte aangetref waar sy besig was om die baba te wurg. Hulle het ingegryp, die baba gevat en vinnig met hom na die plaaslike kliniek gehaas, waar hy deur mediese personeel dood verklaar is.
’n Saak van moord is geopen en die verdagte, ’n familielid van die oorledene, is opgespoor en in hegtenis geneem. Die motief vir die moord is onbekend, maar die verdagte sal binnekort in die Makhado-landdroshof verskyn. Die polisie se ondersoek duur voort.
