KWAZULU-NATAL. – ‘n Vrou, vermoedelik in haar 20’s, het gesterf toe ‘n voertuig waarin sy gereis het op die N2 in ‘n suidelike rigting voor Nandi-rylaan teen ‘n wal af gerol het.
Garrith Jamieson van ALS Paramedics sê luidens ‘n persverklaring dié diens is omstreeks 10:00 vir hulp ontbied. Op die toneel is vyf persone aangetref wat in die enkelvoertuig-ongeluk was. Die voertuigbestuurder het onverklaarbaar beheer verloor, waarna dit gerol en teen die wal af is. Vier insittendes het verskeie beserings opgedoen. ‘n Vroulike insittende is op die toneel dood verklaar.
Die vier beseerdes is gestabiliseer voordat hulle na verskeie Durban-hospitale vervoer is
“ALS Paramedici wil alle motoriste versoek om asseblief stadiger te ry, versigtig te wees en hul bestemming veilig te bereik,” sê Jamieson.
Die polisie was op die toneel teenwoordig.
