MPUMALANGA. – ‘n Vrou (31) wat na bewering haar man (40) se moord beplan het, sal vandag in die Ermelo-landdroshof verskyn. Die man is Woensdag in sy besigheid voor sy werknemers en kliënte doodgeskiet.
Kapt. Magonseni Nkosi sê die slagoffer is ongeveer 15:00 doodgeskiet. Vier verdagtes, waarvan twee gewapen was, het die sakeperseel binnegegaan en op die man geskiet. Hy is op die toneel dood verklaar. Volgens inligting is ‘n onbekende bedrag geld, selfone van die oorledene, werknemers en kliënte geroof..
Die oorledene se vrou is Donderdag tydens die ondersoek gearresteer en met verdere ondersoek is nog vier verdagtes Sondag in Hazyview vasgetrek. Twee verdagtes het daarin geslaag om te ontsnap.
Nkosi sê die verdagtes verskyn vandag in die Ermelo-landdroshof. Die voertuig van die vrou van die oorledene is vir verdere ondersoek gekonfiskeer.
