KWAZULU-NATAL. – ‘n Familie in rou is Woensdag deur twee vroulike verdagtes in hulle huis in die Sunford-area, in Phoenix, aangehou en beroof. Die verdagtes wou kastig medelye betoon.
KZNVIP Protection Services sê die familie het ‘n persoon aan die dood afgestaan en die verdagtes het voorgegee hulle is bure wat wou simpatiseer. Dié diens is ná die huisroof ontbied en is meegedeel die verdagtes was in volle Moslem-uitrustings geklee en het twee skinkborde met eetgoed vir die familie gebring.
“Die oomblik toe hulle toegang tot die huis gekry het, het hulle toegeslaan en die bejaarde vrou en bewoners in die huis vasgebind.”
Hulle het met waardevolle items van die toneel gevlug. Die familie is deur KZN VIP-paramedici bygestaan.
“Alle nooddienste was teenwoordig en die familie het gemeenskapslede versoek om versigtig te wees en nie ook slagoffers van hierdie tipe modus operandi te word nie.”
