KWAZULU-NATAL. – ‘n Vuurwapen het Saterdag omstreeks 11:50 per ongeluk by King Shaka Internasionale Lughawe afgegaan.
Acsa, die lughawemaatskappy van Suid-Afrika, het die voorval aan Nuusflits bevesig.
Die insident het binne die terminaal gebeur.
“Ons wil graag die publiek verseker dat alle veiligheidsmaatreëls ten tyde van die voorval in plek was. ‘n Sekuriteitsbeampte aan diens het dadelik die situasie aangemeld, en die Suid-Afrikaanse Polisiediens het vinnig gereageer. Die veiligheid van ons passasiers en personeel bly ons hoogste prioriteit.”
Acsa sê voorts die insident word deur die polisie ondersoek.
“Acsa sal nie enige verdere besonderhede bekend maak wat die voortgesette ondersoek kan benadeel nie.”
Volgens IOL se beriggewing het ‘n man by die aankomsterminaal gestaan en gesels toe hy sy vuurwapen laat val en die skoot afgegaan het. Persone teenwoordig het op hom geskree en hy het die gebied verlaat.
Nuusflits het polisiekommentaar gevra.
