OOS-KAAP. – ‘n Familie van vyf, twee mans en drie vroue, het Vrydagaand omstreeks 20:30 tydens ‘n skietinsident in Bityi, buite Mthatha, gesterf. Twee verdagtes is Dinsdagaand in hegtenis geneem.
Lt.kol. Siphokazi Mawisa sê die verdagtes, 22 en 39 jaar oud, is in die Msukweni-woonbuurt, in Bityi buite Mthatha gearresteer. Tydens die ondersoek is die polisie geneem na ‘n plek waar ‘n ongelisensieerde Norino-pistool en ammunisie versteek was.
Die verdagtes verskyn vandag op aanklagte van vyf moorde, twee poging tot moord, gewapende roof en die besit van ‘n ongelisensieerde vuurwapen en ammunisie in die Bityi-landdroshof.
Nuusflits het berig al die slagoffers het glo reeds geslaap toe die insident gebeur het. ‘n Ouerpaar het in ‘n rondawel geslaap en is noodlottig gewond toe twee verdagtes binnegestorm en op hulle losgebrand het. Daarna is op familie in ‘n huis op dieselfde erf geskiet. Twee kinders het die aanval oorleef, maar is gewond, waarna hulle vir mediese behandeling na ‘n nabygeleë hospitaal geneem is.
