MPUMALANGA. – Vyf vermeende kitsbankrowers is vroegoggend (Maandag) tydens ‘n skietery in Emalahleni (Witbank) doodgeskiet. ‘n Sesde verdagte is gearresteer.
Foto: SAPD
Kol. Katlego Mogale sê inligting van ‘n beplande opblaas van ‘n OTM is deur ‘n span, wat die taktiese operasionele bestuursafdeling (TOMS), Valke, spesiale taakmag en Falkon Risk Security insluit, in Schoongezicht opgevolg. Verdagtes was glo in ‘n veilige huis, waar die spanne strategies geplaas is om volgens beskikbare inligting vir ‘n wit Toyota Hilux-bakkie uit te kyk. Die span wou die bakkie stop toe dit uit die buurt wou ry, maar daar is op hulle deur die insittendes geskiet. Vyf verdagtes is noodlottig gewond en nog een beseer in die oor-en-weer-skietery wat gevolg het.
Mogale sê die polisie het ‘n R5-geweer, ‘n jaggeweer met ‘n teleskoop, drie 9 mm-pistole en springstof op die toneel gekonfiskeer.
Die bakkie waarin die verdagtes gery het, word verder ondersoek.
