VRYSTAAT. – Vyf mans is vir die ontvoering van en moord op Mike Pattinson (65) van die plaas Summerslie in die Harrismith-hooggeregshof skuldig bevind en gevonnis.
Teboho Mothebedi (22), Jabulane Ngcongwane (44), Bheki Maphalala (18), Lephosa Motaung (26) en Siyabonga Khumalo (22) is saam tot 205 jaar tronkstraf gevonnis.
Kapt. Loraine Earle sê Pattinson is op 23 Julie 2023 op sy plaas aangeval. Waardevolle items en ‘n Toyota Urban Cruiser is gesteel. Pattison is in die kattebak van sy voertuig gedwing, waarna hy in Qwagwa vermoor is. Die verdagtes is die volgende dag op aanklagte van inbraak, roof, ontvoering en moord in hegtenis geneem
Elk van die verdagtes is drie jaar vir inbraak met die doel om te steel, 12 jaar vir roof met verswarende omstandighede, ses jaar vir ontvoering en 20 jaar vir moord, gevonnis. Die vonnisse van aanklag 1 en 2 sal gelyktydig uitgedien word en die vonnisse van aanklag 3 en vier sal gelyktydig uitgedien word.
