LIMPOPO. – Een man en twee vroue is Sondagoggend (14 Desember) omstreeks 01:00 in Polokwane dood, nadat hulle tydens ’n kerkdiens in ’n tent deur weerlig getref is. Altesaam agt mense, tussen 12 en 56 jaar oud, is deur die voorval geraak en na ’n gesondheidsentrum vervoer.
Kol. Malesela Ledwaba, polisiewoordvoerder, sê in ‘n verklaring die kerkgangers van Radimana-dorp het in ’n tent in ‘n oop veld gesing, toe ’n onweersbui begin. ’n Skielike weerligslag het die tent getref, waartydens drie mense dood en nog meer beseer is. Die drie oorledenes is as Ribson Mothemane (46), Mosibudi Mokgobu (44) en Glenda Modjadji Ntjana (36) geïdentifiseer. Die slagoffers is na ’n plaaslike hospitaal geneem vir behandeling, maar is met aankoms dood verklaar.
’n Geregtelike doodsondersoek is deur die polisie geregistreer.
