EUROPA. – Wegholbrande in suidelike Europa het gelei tot die ontruiming van duisende mense en minstens drie sterfgevalle in Spanje, Turkye en Albanië.
Lees ook: Brande in Europa met hittegolf wat temperature oor 40°C druk
Brande in Patras, Griekeland, het daartoe gelei dat sowat 15 brandbestryders behandeling vir brandwonde, rookinaseming of uitputting moes ontvang. ’n Man (80) het suid van Tirana in ‘n brand omgekom.
Inwoners in vier dorpies in Albanië is ontruim ná erge veldbrande in die gebied uitgebreek het. ’n Vrywilliger brandbestryder is tydens ’n brand in Spanje naby Madrid oorlede waar duisende mense ook ontruim moes word.
’n Werker in Turkye is gister oorlede toe hy en sy medewerkers in ’n ongeluk met ’n brandweertrok was. Vier mense is in die ongeluk beseer.
Owerhede in verskeie Europese lande het gesê daar was verskeie redes vir die ontstaan van die brande, insluitend agtelosige plaaspraktyke, kragkabels wat nie behoorlik onderhou word nie en weerligstorms.
Owerhede in Noord-Masedonië en in Spanje het gesê daar is ‘n moontlikheid dat van die brande deur brandstigters veroorsaak is.
Bronne: The Independent, INKL, USA Today
Lees ook: Brande in Europa met hittegolf wat temperature oor 40°C druk
