NOORD-KAAP. – Die polisie, gemeenskapspolisiëringsforum en ‘n besigheid het Woensdag saam in ‘n uitreikingsprogram 100 kospakke aan die gemeenskap van Riemvasmaak oorhandig.
Sers. Omphile Masegela sê die ZF Mgcawu-distrik-GPF, die plaaslike polisie en KDHT Investments het die kospakke in die Sending en Vredesvallei-gebiede oorhandig en gewys hulle gee om.
“Tydens vorige misdaad-ingrypings in die Riemvasmaak-omgewing is tekortkominge geïdentifiseer wat uit sosio-ekonomiese uitdagings voortspruit. Gevolglik het die Gemeenskapspolisieforum ‘n program begin om sommige van die uitdagings aan te spreek.”
Masegela sê die program is gepas deur gebed geopen en verskeie hooggeplaastes het die geleentheid bygewoon, waartydens die gemeenskap gevra is om in die geveg teen misdaad saam met die polisie te werk.
“Die polisie kan nooit in isolasie werk nie, daarom is Riemvasmaak aangeneem, om te verseker dat die verhouding tussen die SAPD, die gemeenskap deur die GPF, plaaslike NRO’s, en die sakesektor gehandhaaf word,” sê maj. genl. Monica Sebili, die distrikskommissaris.
