GAUTENG. – Job Sikhala (53), ‘n Zimbabwiese politikus, en Alexander Ferrowst Thema (78) is elk R10 000 borgtog deur die Pretoria-landdroshof toegestaan. Hulle word van die besit van springstof aangekla.
Lumka Mahanjana, NVG-woordvoerder, sê volgens die aanklag is die twee op 6 November deur die polisie in Kgosi Mampuru-straat deursoek, waartydens 26 springpatrone en 15 ontstekers gevind is. Die staat het nie ‘n aansoek om borgtog teengestaan nie. Chris Maruma, die staatsaanklaer, het twee beëdigde verklarings van sers. Thabo Madia, die ondersoekbeampte, voorgelê wat bevestig dat beide beskuldigdes wettig in die land is. Sikhala het ’n geldige visum en Thema is in besit van ’n ID van SA. Die verklarings het verder aangedui dat die beskuldigdes nie in ’n posisie is om getuies of die ondersoek te belemmer nie.
Die saak is vir verdere ondersoek tot 3 Februarie 2026 uitgestel.
