GAUTENG. – Waldo Verwey van Casseldale, Springs, is steeds aan lewensondersteuning gekoppel en kritiek, maar in ‘n stabiele toestand nadat hy Donderdagaand deur booswigte in die kop geskiet is.
Nuusflits het voorheen berig volgens sy pleegma, Christenette Barnard, het die voorval kort voor 22:00 plaasgevind nadat sy, Waldo en Kleinboet die gesin se honde in die erf uitgeneem het. Sy vertel dat sy en haar jonger seun terug in die huis was toe hulle ’n harde klap gehoor het.
“Ek het gevra wie nou dié tyd van die aand klappers skiet,” sê sy. Haar jonger seun het gaan kyk en teruggekom met die skokkende woorde: “Mamma, Waldo is dood.” Toe sy uitstorm, het sy vir Waldo met ernstige kopbeserings aangetref. Die koeël het hom net bokant die oog getref en aan die agterkant van sy kop uitgekom. Hy is per lugambulans na die Charlotte Maxeke Johannesburg Akademiese Hospitaal geneem, waar hy tydens die vlug as gevolg van skok ’n beroerte opgedoen het.
‘n Saak van poging tot moord word deur die polisie ondersoek.
