WES-KAAP. – Vier verdagtes is Saterdagoggend in hegtenis geneem ná ’n rooftog in Simonstad se hoofweg. Die verdagtes het na bewering slagoffers van hul selfone en kontant beroof terwyl hulle ’n vuurwapen gebruik het wat later as ’n sogenaamde leë (blank) vuurwapen beskryf is.
Volgens Mach 1 Security het ’n verbyganger die rooftog opgemerk en onmiddellik die veiligheidsmaatskappy gebel. Reaksiebeamptes het saam met Fidelity ADT Security en die Simonstadse Sentrale Buurtwag opgetree en die eerste twee verdagtes op die toneel vasgetrek. Inligting het daarop gedui dat die ander twee verdagtes in die rigting van Dido Valley gevlug het. Mach 1-beamptes Konke en Themba het hulle in dié gebied opgespoor en ook in hegtenis geneem.
Al vier verdagtes is volgens Mach 1 Security aan die polisie oorhandig. Die polisie se verdere optrede en die aard van die aanklagte is nie in die veiligheidsmaatskappy se verklaring uiteengesit nie.
