GIBRALTAR, SPANJE. – ’n Seiljag is Sondag in die Gibraltar-kanaal suid van Spanje deur ‘n onbekende aantal orkas gesink.
Daar was twee mense aan boord die 15 m lange Alboran Cognac-seiljag toe hulle skielike stampgeluide teen die boot gevoel het. Kort daarna het water ingesypel.
Reddingswerkers is ontbied, maar ’n nabygeleë olietenkskip het tot hulle redding gekom. Die passasiers is aan die kus afgelaai, waarna die seiljag aanvanklik gedryf, maar later wel gesink het.
Die afgelope vier jaar is soortgelyke gevalle aan die toeneem waar orkas gate in die skepe maak terwyl dit gestamp word.
Kenners is van mening dat die orkas dit nie noodwendig gewelddadig bedoel nie, maar speel.
Geen beserings is aangemeld nie.
Bronne: Sailing Shuttle Butt, Business Insider
