OOS-KAAP. – Die polisie in die Oos-Kaap het ’n dringende beroep op die publiek gedoen om honde te skenk, om ’n ernstige tekort by die provinsie se K9-eenhede aan te spreek.
Luidens ‘n verklaring van polisiewoordvoerder AO Majola Nkohli beïnvloed die tekort die doeltreffendheid van misdaadbekamping, soek-en-reddingsoperasies, asook speur- en opsporingswerk regoor die provinsie. Die polisie sê slegs gesonde, selfversekerde en energieke honde wat nie bang is vir mense of harde geluide nie, sal oorweeg word. Voorkeur sal gegee word aan rasse soos Duitse herdershonde, Belgiese Malinois, Labradors, Rottweilers, Bloedhonde, Border Collies, Jack Russells en Nederlandse herdershonde. Die honde sal opgelei word vir speurwerk, soek-en-reddingsoperasies of patrollie- en inhegtenisnemingstake.
Die polisie sê belangstellendes kan die K9-eenheid se donasiekoördineerder kontak vir verdere inligting. Bel AO Chris Hegie by 072 735 0116.
Nkohli sê die keuringskriteria is soos volg:
Vir speur- en soektake: Honde wat vir opsporing van dwelms, plofstof of vuurwapens, asook soek-en-reddingswerk bedoel is, moet ’n hoëspel-/prooidryf toon, wat blyk uit ’n intense fokus op en begeerte om balle of speelgoed na te jaag.
Vir patrollie- en inhegtenisnemingstake: Honde wat vir patrolliediens opgelei word, moet ’n nie-emosionele, roofdieragtige prooidryf toon, wat verband hou met die beheerde aggressie wat nodig is vir die inhegtenisneming van verdagtes en beskermingswerk.
