GAUTENG. – Die departement van korrektiewe dienste sê die Stad Tshwane het op grond van foutiewe rekeninginligting verkeerd opgetree deur te probeer om elektrisiteit by die Kgoši Mampuru II Korrektiewe Sentrum af te skakel. Die DKD sê hy is veral bekommerd daaroor dat dr. Nasiphi Moya, die uitvoerende burgemeester, openbare uitsprake oor die beoogde afskakeling gemaak het sonder om die feite vooraf te verifieer.
Volgens die departement is geen krag afgeskakel nie nadat die fout uitgewys is. Korrektiewe Dienste sê die Stad het opgetree sonder behoorlike verifikasie en het voortydige openbare verklarings gemaak oor ’n kritieke staatsfasiliteit.
Die departement waarsku dat sulke administratiewe foute en openbare uitsprake die bedryf en geloofwaardigheid van korrektiewe sentrums kan benadeel. DKD sê voorts die Stad behoort die verkeerde inligting in die openbaar reg te stel.
